ឯកឧត្តមបណ្ឌិត ធន់ វឌ្ឍនា និងឯកឧត្តមបណ្ឌិត ចែម វីឌ្យ៉ា សមាជិកព្រឹទ្ធសភាប្រចាំភូមិភាគទី១ (រាជធានីភ្នំពេញ) បានអញ្ជើញជួបសំណេះសំណាលជាមួយនឹងក្រុមប្រឹក្សាសង្កាត់ និងអាជ្ញាធរមានសមត្ថកិច្ច ដើម្បីស្វែងយល់អំពីបញ្ហាប្រឈម និងសំណូមពរផ្សេងៗ នៅខណ្ឌចំការមន រាជធានីភ្នំពេញ នាពីរសៀលថ្ងៃទី៣ ខែកញ្ញា ឆ្នាំ២០២៤ ដោយមានការអញ្ជើញចូលរួមពីថ្នាក់ដឹងនាំខណ្ឌ ក្រុមប្រឹក្សាសង្កាត់ និងអាជ្ញារធមូលដ្ឋានសរុបប្រមាណ ៣០នាក់។
ឯកឧត្តម មានប្រសាសន៍កោតសរសើរ ដល់មន្រ្ដីមូលដ្ឋាន ដែលបានធ្វើការប្រកដោយតម្លាភាព មានប្រសិទ្ធភាព ធានាសុវត្ថិភាពសាធារណៈ សន្តិសុខសង្គម ព្រមទាំងដោះស្រាយបញ្ហាជីវភាពរបស់ប្រជាពលរដ្ឋទាន់ពេលវេលា។
ឯកឧត្តមបណ្ឌិត ធន់ វឌ្ឍនា បានលើកឡើងថា ព័ត៌មានអំពី CLV ត្រូវបានបោះផ្សាយយ៉ាងច្រើន នៅតាមអ៊ីនធឺណែត ការសែតក្នុងស្រុក និងបរទេស ក្នុងមួយឆ្នាំមានប្រហែល៤-៥អត្ថបទ ដោយមិនមានការលាក់បាំងដូចការលើកឡើងរបស់បុគ្គលមួយចំនួននោះទេ និងត្រូវរួមគ្នាពន្យល់អំពីសេចក្ដីពិតនៃ CLV DTA ជូនញាតិមិត្តរបស់យើង។
ឯកឧត្តមបណ្ឌិត ធន់ វឌ្ឍនា បានពន្យល់បន្ថែមអំពី CLV DTA និងបានអនុញ្ញាតឱ្យសមាជិកក្រុមប្រឹក្សាសង្កាត់អានមាត្រាមួយចំនួននៃកិច្ចព្រមព្រៀងនោះ។
ឯកឧត្តមបណ្ឌិត ធន់ វឌ្ឍនា បានលើកឡើងថា ក្នុងស្ថានភាពសេដ្ឋកិច្ចពិភពលោកពិបាកនាពេលបច្ចុប្បន្ន ក៏កម្ពុជា បានសម្រេចកំណើនសេដ្ឋកិច្ចល្អ នេះបើតាមទិន្នន័យរបស់ មូលនិធិរូបិយវត្ថុអន្តរជាតិ (IMF) បានបង្ហាញថា GDP របស់កម្ពុជាមាន ៦% នៅឆ្នាំ២០២៤, វៀតណាមមាន ៥.៨%, ឡាវមាន ៤%, ថៃមាន ២.៧% និងមីយ៉ានម៉ាមាន ១.៥%។
ខ្លឹមសារ ៖ ការិយាល័យជំនួយការគណៈកម្មការទី២ព្រឹទ្ធសភា
ប្រភព៖ នាយកដ្ឋានព័ត៌មាន
